క్రికెట్‌లో కామెడీ…!

క్రికెట్ మైదానంలో ఆటగాళ్లు ఎంత అంకిత భావంతో ఉంటారో..? అందరికీ తెలిసిందే. ఫీల్డింగ్ సమయంలో గాయాల గురించి ఏమాత్రం ఆలోచించకుండా బంతి కోసం మొండిగా డైవ్ చేస్తుంటారు. ఈ క్రమంలో గాయమై రక్తమోడుతున్నా.. బంతిని త్రో చేసిన తర్వాతే దాని గురించి ఆలోచిస్తారు. అలాంటిది ఫీల్డింగ్ సమయంలో ప్యాంట్ జారిపోతే..? ఆస్ట్రేలియాలో ప్రస్తుతం జరుగుతున్న దేశవాళీ వన్డే టోర్నీలో సరిగ్గా ఇదే సన్నివేశం చోటు చేసుకుంది.
ఆస్ట్రేలియాలో మార్ష్‌‌కప్‌లో భాగంగా వన్డే టోర్నమెంట్ జరుగుతుండగా.. తాజాగా క్వీన్స్‌లాండ్, విక్టోరియా జట్లు ఢీకొన్నాయి. ఈ మ్యాచ్‌లో క్వీన్స్‌లాండ్‌కి చెందిన ఫీల్డర్ మార్నస్ లబు‌ఛేంజ్ బంతిని నిలువరించేందుకు పక్కకి డైవ్ చేశాడు. ఈ క్రమంలో బంతిని అయితే అతను ఆపగలిగాడు. కానీ.. అతని ప్యాంట్ మాత్రం కిందకి జారిపోయింది. అయినప్పటికీ.. ప్యాంట్‌ గురించి పట్టించుకోని మార్నస్.. రెప్పపాటులో బంతిని నేరుగా వికెట్ కీపర్‌కి త్రో చేశాడు. అప్పటికి విక్టోరియా బ్యాట్స్‌మెన్ క్రీజులోకి రాలేకపోవడడంతో రనౌటయ్యాడు.

బంతిని విసిరిన తర్వాత కీపర్ రనౌట్ చేసే వరకూ మార్నస్ అలానే నేలపై కూర్చుని ఉన్నాడు. ఆఖరిగా బ్యాట్స్‌మెన్ రనౌటని నిర్ధారించుకుని.. అప్పుడు తీరిగ్గా లేచి ప్యాంట్ సరిచేసుకుని సహచరులతో కలిసి వికెట్ సంబరాలు చేసుకున్నాడు. ప్రస్తుతం ఈ వీడియో సోషల్ మీడియాలో వైరల్‌గా మారింది.