రాజమహేంద్రవరంలో రేపు జనసేన ఆవిర్భావ సభ..


జనసేన
 పార్టీ ఆవిర్భావ దినోత్సవాన్ని పురస్కరించుకుని గురువారం(మార్చి 14)న భారీ బహిరంగ సభ నిర్వహిస్తోంది ఆ పార్టీ. తూర్పుగోదావరి జిల్లా రాజమహేంద్రవరం ఆర్ట్స్ కాలేజ్ మైదానంలో గురువారం సాయంత్రం ‘యుద్ధ శంఖారావం’ పేరుతో సభ నిర్వహించనున్నారు. జనసేన రాజమహేంద్రవరం ఎంపీ అభ్యర్థి ఆకుల సత్యనారాయణ, ముఖ్యనేత కందుల దుర్గేష్ సభ ఏర్పాట్లను స్వయంగా పర్యవేక్షిస్తున్నారు.

జనసేన పార్టీ ఆవిర్భావ సభకు 13 జిల్లాల నుంచి జన సైనికులు తరలివస్తారని నేతలు చెబుతున్నారు. ధవళేశ్వరం బ్యారేజీపై కవాతు స్ఫూర్తితోనే ఆవిర్భావ సభ కూడా రాజమహేంద్రవరంలోనే ఏర్పాటుచేసినట్లు జనసేన వర్గాలు పేర్కొంటున్నాయి. అభ్యర్థుల ఎంపికలో తలమునకలై ఉన్న పవన్‌కళ్యాణ్ ఈ సభ నుంచే ప్రచారాన్ని ప్రారంభిస్తారని తెలుస్తోంది. అభ్యర్థులను కూడా ప్రకటించే అవకాశం ఉన్నట్లు సమాచారం.

గత సభలకు భిన్నంగా ఆవిర్భావ సభ జరుగుతుందని జనసేన నేతలు చెబుతున్నారు. ప్రత్యర్థులపై విమర్శలకు ప్రాధాన్యం ఇవ్వకుండా ప్రజా సమస్యల పరిష్కారం దిశగా జనసేనాని ప్రసంగిస్తారని తెలుస్తోంది. ఈ సభ తర్వాత అన్ని జిల్లాల్లో సభలు ఏర్పాటుచేసి ప్రచారాన్ని వేగవంతం చేయాలని ప్లాన్ చేస్తున్నారు. అన్ని జిల్లాలను చుట్టేసేలా పవన్ కోసం చాపర్ ఏర్పాటుచేశారు.

పార్కింగ్ ఇలా..
ఆవిర్భావ సభకు అన్ని జిల్లాల నుంచి జన సైనికులు తరలివచ్చే అవకాశం ఉంది కాబట్టి పకడ్బందీ ఏర్పాట్లు చేస్తున్నారు. నిర్ణీత పార్కింగ్‌ ప్రదేశాల్లోనే వాహనాలను నిలపాలని నిర్వాహకులు కోరుతున్నారు. విశాఖ నుంచి వచ్చే వాహనాలకు లాలాచెరువు హోండా కార్ల షోరూం వద్ద, కొవ్వూరు మీదుగా వచ్చే వాహనాలకు ఎస్‌కేవీటీ కళాశాల వద్ద పార్కింగ్ ఏర్పాటు చేశారు. సభ సాయంత్రం 4గంటల నుంచి 7గంటల వరకు జరగనుంది. సభకు వచ్చే కార్యకర్తలు, అభిమానులు ఎలాంటి ఇబ్బందిపడకుండా మంచినీరు, మజ్జిగ అందుబాటులో ఉంచుతున్నారు.