యూపీలోని జబల్‌పూర్‌కు చెందిన ఒక జంట అంతర్జాతీయ మార్కెట్లో ప్రపంచంలోనే అత్యంత ఖరీదైనదిగా పిలువబడే అరుదైన మామిడి పండ్లను పండించారు.

రాణి మరియు సంకల్ప్ పరిహార్, తమ పండ్ల తోటలో కొన్ని సంవత్సరాల క్రితం తాము కేవలం రెండు మామిడి మొక్కలను నాటినట్లు చెప్పారు. ఈ మామిడి  జపనీస్ మియాజాకి రకం అని తెలిసింది. ఇది ప్రపంచంలోనే అత్యంత ఖరీదైన రకాల్లో ఒకటి, గత ఏడాది అంతర్జాతీయ మార్కెట్లో కిలోకు రూ .2.70 లక్షలకు అమ్ముడైంది.

చెన్నైకి వెళ్లే సమయంలో రైలులో ఉన్న వ్యక్తి ఈ మొక్కలు మాకు ఇచ్చాడు. జాగ్రత్తగా చూసుకోవాలని కోరాడు. పండ్ల తోటలో ఏ రకమైన మామిడి పండ్లు ఉత్పత్తి అవుతాయో తెలియక మేము పండించాము, అని పరిహార్  మీడియాకు తెలిపారు. తనకు లభించిన రకానికి అసలు పేరు తనకు తెలియదని, దానిని దామిని అని పిలవాలని నిర్ణయించుకున్నానని పరిహార్ తెలిపారు. తరువాత, మేము ఈ రకం గురించి పరిశోధించాము మరియు అసలు పేరును కనుగొన్నాము. కానీ ఇది ఇప్పటికీ నాకు దామిని, అంటూ అతనుచెప్పాడు. అయితే వారి మామిడిపండ్లు స్థానికంగా ప్రసిద్ది చెందిన తరువాత ఈ జంట చాలా సమస్యలను ఎదుర్కోవలసి వచ్చింది. గత ఏడాది దొంగలు తమ పండ్ల తోటలోకి ప్రవేశించి మియాజాకి మామిడి పండ్లను దొంగిలించారని పరిహార్ తెలిపారు.

దొంగతనం ప్రమాదం కారణంగా, ఈ జంట ఇప్పుడు చెట్లను రక్షించడానికి నలుగురు గార్డులు మరియు ఆరు కుక్కలను నియమించింది. అనేకమంది మామిడి సాగుదారులు, పండ్ల ప్రేమికులు తమను సంప్రదించారని, ఒక వ్యాపారవేత్త ఒక మామిడి కోసం రూ .21 వేలు ఇస్తున్నారని రాణి చెప్పారు. ముంబైకి చెందిన ఒక స్వర్ణకారుడు వారు చెప్పిన ఏ ధరనైనా చెల్లించడానికి సిద్ధంగా ఉన్నారని ఆమె తెలిపారు. కానీ ఈ పండు ఎవరికీ అమ్మడం లేదని ఇప్పుడు ఈ జంట స్పష్టం చేసింది. మధ్యప్రదేశ్ హార్టికల్చర్ విభాగం జాయింట్ డైరెక్టర్ నిర్వహించిన తనిఖీలో మామిడి పండ్లు భారతదేశంలో చాలా అరుదు అని తేలింది.